بدايه بسم الله
هنتكلم انهارده عن واحد عايش زى كل الناس
بس فجأه
قابل نصه التانى النص اللى كان بيدور عليه من زمان
شايف اد ايه هى جميله واد ايه هو وسيم
اتقابلوا مع بعض وخرجوا مع بعض وكمان حبوا بعض
بدايه حكايتنا هتبدأ من اول ما بدأوا حياتهم مع بعض
اتجوزوا
ايوة ..........كان يوم جميل
اد ايه هو كان فرحان
اد ايه هى كانت فرحانه
هو فرحان بعروسته الجميله اللى بيحبها ووعد منه هيخليها اسعد انسانه ف الوجود
هى فرحانه بحبيبها وعريسها وطبعا بفستانها الابيض الجميل
الفرح خلص وكل الناس هنت واتعشت وكان يوم جميل واد ايه كله تعب فى اخراج يوم اجمل من كده متلاقيش
دخلوا البيت
اقصد العش الجميل
العش الصغير اللى بناه الزوج العفش جديد والدهان جديد وكل حاجه هنا جديد ف جديد
وتمر ليله من اجمل ليالى الف ليله وليله
كله كان فرحان كله مكنش مصدق ان دا حقيقه
كله كان متوقع انه ف حلم
حلم جميييييييييييييل
ياريت يفضل علاطول جميل
تمر اول سنه ع اجمل عروسين
وبعدها تنور اول شمعه ف البيت هوا انت
اول طفل لاطهر قلبين
اد ايه الفرحه كتيره وماليه عنيهم
اد ايه انت نورت لهم مستقبلهم الطويل
تعدى سنه .......اتنين.....تلاته
وكل يوم انت بتكبر اكتر واكتر
وف عنيهم اكبر واكبر
والاب اللى كان من سنتين بلا مسؤليه
اصبح الان بمسؤليه
والام اللى من سنتين كانت لسه بنت رقيقه صغيره
اصبحت الان ام ومسؤله عن ابنها
تعدى الايام والسنين وانت بتكبر وبرده الاعباء بتكبر والاب والام بردوا بيكبروا
البيت اللى كان جديد ودهانه جديد
دلوقتى حطانه مليانه شروخ
والعفش اللى كان برده جديد
دلوقتى ظهر هو كمان عليه علامات الشيب
بص ف الجنب تلاقى راجل عجوز وجمبه ست عجوزه قاعدين
قاعدين
محدش بيكلمهم ولا بيفضفض معاهم
خلاص كلامهم خلص وكمان ضحكهم خلص
هما قاعدين مستنين حد يدخل عليهم الفرحه تانى ويكلمهم تانى
بس استنى
انت فين
انت رحت فين
صحيح .........انت خلاص كبرت وبقى لك مسئولياتك ومعدتش فاضى ليهم
انت ممكن دلوقتى تكون ع النت او بتتفسح او عند اصحابك
بس يا ترى فاكر الاتنين اللى حبوك وياما دلعوك
فاكر الاتنين اللى اشتروا لك اللعب والعجله وانت صغير
فاكر لما كنت نايم تعبان وهما سهرانين حواليك بيقروا لك القرأن
انت ليه نسيت كل ده
ومش فاكر غير اللى يخصك
